Творчая ініцыятыва «МАРАфон» абвясціла аб пачатку кампаніі, закліканай змяніць «фармат» айчынных FM-радыёстанцыяў.

«Нас вельмі непакоіць той ганебны для незалежнай краіны факт, што на мове тытульнай нацыі ані ў эфіры беларускіх тэлеканалаў, ані радыёстанцыяў няма сучаснай беларускамоўнай музыкі. Музычныя рэдактары на радыё і тэлебачанні, відаць, маюць своеасаблівы стэрыятып, які захаваўся з савецкіх часоў: калі па-беларуску – дык гэта абавязкова «калгас», то бок нейкія фальклорныя спевы. Таму яны папросту ігнаруюць беларускамоўнае. Нам прыдзецца давесці рэдактарам айчынных радыёстанцыяў, што беларускамоўная музыка не горшая за музыку на любой іншай мове свету, у тым ліку і сучасныя апрацоўкі беларускага спеўнага фальклору», – кажа адзін з каардынатараў кампаніі Адам Птушка.

Ініцыятары кампаніі «Наш FарМат» фактычна возьмуць на сябе абавязкі грамадскага прадусарскага цэнтра: «МАРАфон» наладзіць штомесяцовы адбор беларускамоўных песняў для FM-радыёстанцыяў Беларусі.

«Зразумела, мы не збіраемся ствараць новае радыё, хаця тэматычных па стылях радыёстанцыяў нам сапраўды бракуе. Музычны матэрыял будзе адбірацца ў поўнай адпаведнасці з існым забаўляльным фарматам FM-радыё, то бок гэта будзе якасная беларускамоўная поп-музыка, танцавальныя версіі не зусім фарматных трэкаў, поп-рок і гэтак далей. Гэтак кожны месяц, пачынаючы з верасня, мы будзем мець дзесяць песняў на беларускай мове, якія пасля натуральнай працэдуры дамоваў і узгадненняў з праваўладальнікамі, музыкамі, і атрымання песняў у адпаведнай якасці мы будзем перадаваць у ратацыю на FM-радыёстанцыі. Слухачы атрымаюць мажлівасць смела падчас праграмаў віншаванняў і прывітанняў замаўляць улюбёныя песні на роднай мове. Спіс трэкаў ды іх mp3 мы будзем рэгулярна выкладаць на нашых старонках у «Жывым часопісе» (nashfarmat.livejournal.com) ды сацыяльных сетках, дзе можна будзе сачыць за развіццём падзей», – тлумачыць дэталі правядзення кампаніі Міхал Нядзьвецкі.

Арганізатары доўгатэрміновай акцыі «Наш FарMат» не лічаць сябе першапачынальнікамі:

«Так, колькі год таму была серыя «Штурмаў FM». Аднак, на жаль, як мы маем мажлівасць цяпер бачыць і чуць, тыя акцыі не займелі належнага выніку, нягледзячы на атрыманне некалькіх кропкавых перамог. Мы лічым сябе прадаўжальнікамі «Штурмаў». Толькі з адной істотнай розніцай: «эфэмшчыкі» будуць пазбаўленыя магчымасці адмовіць сваім слухачам паставіць беларускамоўную песню са спасылкай на адсутнасць гэтакіх у іх плэй-лісце, на што яны і скардзіліся», – працягвае Міхал Нядзьвецкі.

Днямі ў СМІ прасачылася інфармацыя пра мажлівае зніжэнне квоты беларускай музыкі ў радыёэфіры з 75-ці да 50% . Пра гэта паведаміў interfax.by за спасылкай на крыніцу ў органах дзяржкіравання.

«Зразумела, гэтае зніжэнне лабіююць самі FM-радыёстанцыі, бо для іх гэта выгадна найперш з фінансавага боку. Мы ж у такім разе у адпаведнасці з Канстытуцыяй і «Законам аб мовах у Рэсубліцы Беларусь», досведам заходнееўрапейскіх краін, перш за ўсё Францыі, маем выступіць з патрабаваннем замацаваць у новай рэдакцыі закона абавязковыя для радыёэфіра 25% музыкі на рускай мове і, адпаведна, 25% музыкі на беларускай мове. Гэта сталася б добрым крокам з боку ўладаў з мэтаю падтрымкі беларускай мовы, якую нядаўна UNESCO ўнесла ў спіс моваў, якім пагражае знішчэнне» – кажа Адам Птушка.

Кампанія па беларусізацыі FM-радыёстанцыяў «Наш FарMат» стартуе ўжо ў гэтым месяцы – жніўні.

Па любых пытаннях з каардынатарамі можна звязацца праз і-мэйл – nashfarmat@gmail.com.

Даведка: моладзевая творчая ініцыятыва «МАРАфон» існуе з 2008 году. Арганізавала прэмію беларускамоўнага музычнага відэа «Кліп-марафон» (2008). Пры дапамозе БМАgroup і партала Lacinka.org была выдадзена DVD-кампіляцыя з 42 лепшых беларускамоўных кліпаў за апошнія 20 год.

Каардынатары кампаніі «Наш фармат»:

Адам Птушка
+37529 1671480
svierb@gmail.com

Міхал Нядзьвецкі
+37529 6010769
niadzvetski@gmail.com